РИМ – З нагоди Ювилейного року од 24. по 30. юний було стретнуце за шестри Служебнїци Нєпорочней Дїви Мариї у Риме у їх Ґенералним доме.
У рамикох того стретнуца шестри Служебнїци нащивели велї церкви и святи места, а у розпорядку була и аудиєнция зоз папом Левом XIV, хторе було стреду 25. юния, у Базилики св. Петра.
Тото стретнуце було святочне и виволало емоциї окреме кед ше папа Лев XIV приблїжел ґу людзом з окремнима потребами, а тиж и младим котри чекали його благослов. Шицки цо там були, принєсли зоз собу, у куцику свойого шерца малу надїю же их Господь прейґ молитвох папи Лева XIV благослови, виздрави и помогнє висц зоз бриґох. На аудиєнциї була ш. Авґустина Илюк зоз Руского Керестура, ш. Святослава Лало и ш. Тарсикия Ивасик зоз провинциї св. Осифа.
Шестри Служебнїци на свойо стретнуце пришли зоз 6 державох, а 24 шестри вєдно зоз ш. Софию Лебедович, ґенералну настоятельку зоз Риму, тиж чекали на аудиєнцию зоз папом Левом. Стретнуце було кратке, алє паметлїве за цали живот, бо указало же зме Богови потребни, а Господь прейґ папи Лева виражує свою потримовку шицким нам.