Остатнї мешац були барз „интересантни”. Нє нательо „явно” у смислу протестох, гарештованьох, наступох опозициї и власци, НИС-а, України и так далєй. Було ту шицкого и будзе и надалєй, алє досц ше того случело „спод жита”. У ствари, случело ше тельо того же дацо сиґурно забудзем, лєбо випущим спомнуц, алє тото цо спомнєм повязане прейґ двох мотивох: контрола и вимсценє и думам же су длугорочно барз важни.
Перша, то вименки Закона о войску, конкретно член 19 у хторим стої хто и як командує зоз Войском Сербиї. Упросцел сом, алє у сущносци, то пише. По старим, зоз войском командую и руководза начальнїк Ґенералштабу и старшини у складзе зоз законом и предписанями. По новим, зоз Войском командує начальнїк Ґенералштабу у складзе зоз законом, предписанями и одлуками предсидателя Републики. Гмммм, чом сом ше такой здогаднул 9. марца 1991. року? А, гей, прето же зме теди мали тенки на улїци у Беоґрадзе, а зоз вименками Закона о Войску лєгко их можеме мац знова кеди ґод предсидатель Републики преценї же єст за таким потреба. Нє гварим же ше то случи, алє тиж так нє виключуєм можлївосц же дахто у даєдним моменту може преценїц же на териториї Сербиї постої терористичне гроженє за цо нєобходне анґажовац войско. Думайце о тим.
Друга важне ствар „спод жита” то инициятива же би ше Явне тужительство за орґанизовани криминал (ТОК) положело под компетенцию Висшого явного тужительства у Беоґрадзе. Тераз, понад ТОК у гиєрархиї лєм Верховне явне тужительство. Кед ТОК прейдзе под компетенцию Висшого явного тужительства воно гиєрархийно будзе виєдначене зоз Основним явним тужительством. Могол бим о тим написац нє єден текст и толковац нашироко чом тота инициятива опасна, алє зводзи ше на то же би ТОК страцел огромну часц, кед нє и цалком, своєй хвильковей самостойносци.
Трецу ствар нє знам анї дзе змесциц, до хторей катеоґориї шалєнства. Слово о гласаню за змену ректора Новосадского универзитета Деяна Мадича. Идземе шором. Науково-наставни ради факултетох и институтох у рамикох Универзитета гласали на своїх схадзкох же би ректор бул зменєни. Тото гласанє нє обовязує деканох, алє на одредзени способ дава напрям. Медзитим, кед пришол дзень за гласанє, змена нє вигласана… Даскельо тижнї после гласаня, ещи вше сом нє поскладал думки до лоґичного шлїду прето же ше боїм єдиного можлївого заключеня хторе глаши „наївни ши Задрепко и умреш наївни”. Якош ми треба часу же бим знова освидомел дацо цо у ствари знам, а то же особни интерес вше и (скоро) шицким понад общого и же то єдноставно так и же, як ствари у тей хвильки стоя, так и останє. А вам кед так добре, вец нїч*.
*мото интернет порталу Peščanik
Становиска висловени у тим тексту виключно авторово и нє вше одражую ушорйовацку политику новинох „Руске слово”.