РУСКИ КЕРЕСТУР – Швето Богоявлениє Господнє у парохиї св. отца Миколая означене пондзелок, 6. януара, у трох Службох Божих: на 8, на 10 и на 17. годзин.
Службу на 10 годзин служели керестурски парох о. Владислав Варґа, о. Михайло Шанта и о. Ярослав Варґа. После Служби у окремним обряду пошвецели воду. Молитви котри ше читаю з тей нагоди указую на значносц швета кед Йоан Креститель покресцел Исуса у рики Йордану. Праве теди Господь обявел швету же Исус Христос – Його син.
После пошвецаня, воду однєсли до порти, до двох вельких гордовох одкаль вирни пошвецену воду беру и ноша ю до обисцох. Воду вирни похасную у пошвецаню обисцох. Вери ше, а так ше у молитвох и модлї, же тота швецена вода була хороуму на оздравенє и каждому на хасен.
Пошвецанє обисцох у валалє почнє од штвартку 9. януара и будзе тирвац по 20. януар, а паноцове ше зоз вирнима у їх обисцох стретню през тидзень. У тим периодзе вечарши служби ше нє будзе служиц, лєм ранши.
Розпорядок пошвецаня мож опатриц на Фейсбук боку Катедрали, як и на огласней табли у порти.
