РУСКИ КЕРЕСТУР/НОВИ САД – Медзинародни наукови симпозиюм „Владика Дионизий Няради: живот и дїлоˮ отримани 30. новембра у Руским Керестуре и 1. децембра у Новим Садзе, а отримани є з нагоди 150-рочнїци од народзеня владики др Дионизия Нярадия (1874–1940).
Симпозиюм започал зоз Архиєрейску Службу Божу у Катедралней церкви св. отца Миколая у Руским Керестуре на 10 годзин. Службу предводзели пейцме владикове, од котрих двоме нунцийове, шейсцме священїки зоз иножемства и дзевецме священїки нашей Епархиї, присутне було и вельке число монахох и монахинї з нашей и других Епархийох, представнїки скоро шицких наших парохийох як и велї вирни з Руского Керестура.
На початку Служби владикох привитали дзеци зоз центру „Йосафатаˮ. На служби дзияковали дзияк з Руского Керестура, Нового Саду и дзиячка зоз Коцура, як и Катедрална шпивацка ґрупа. Апостол пречитал новосадски дзияк, а евангелиє читал о. мр Дарко Рац. У своєй казанї кир Георгий Джуджар привитал госцох и указал на значносц симпозиюма и владики др Дионизия Нярадия.
После служби служена панахида за покойного владику др Дионизия Нярадия, а по служби госци зишли до крипти у котрей поховани пейцме владикове, синове нашого народу.
Симпозиюм пошвецени животу и дїлу владики др Дионизия Нярадия започал у Виронаучней сали на 15 годзин у присустве госцох, викладачох и заинтересованих вирних. У першей часци наступела и Женска шпивацка ґрупа Дома култури зоз двома духовнима шпиванками. Того пополадня наступели науковци, професоре, историчаре, виглєдоваче зоз Горватскей, Словацкей, Италиї (Риму), України, Македониї, Сербиї… Под час симпозиюма у сали у Каритасу отримана вистава пошвецена владикови Дионизийови.
Симпозиюм предлужени внєдзелю, 1. децембра у Новим Садзе. На 10 годзин служена Архиєрейска Служба Божа у Конкатедралней церкви св. апостолох Петра и Павла, хтору предводзели штирме владикове и священїки хтори були на означованю 150-рочнїци од народзеня владики др Дионизия Нярадия. Апостол пречитал новосадски дзияк Йовґен Надь, а евангелиє читал ґенерални викар Прешовскей архиепархиї и представнїк митрополита Йони Максима отец Марко Дурлак, а наказовал и госцох привитал епарх Георгий Джуджар.
У Заводу за културу войводянских Руснацох у Новим Садзе предлужени Симпозиюм з нагоди живота и дїла владики др Дионизия Нярадия на хторим три реферати презентовани онлайн, а ище штирме науковци участвовали на симпозиюму у Заводових просторийох.
Дводньови симпозиюм закончени у приємней розгварки науковцох и здогадованю на владику др Дионизия Нярадия, хтори бул народзени у Руским Керестуре.
