РУСКИ КЕРЕСТУР – Вчера вечар, 28. марца отримани ище єден протест зоз цихосцу и галайком, як знак потримовки студентским протестом котри тирваю уж мешацами, насампредз пре траґедию на Желєзнїцкей станїци Нови Сад кед настрадали 16 особи, а єдна чежко покалїчена.
Сход бул у центру валала на 17:50 годзин, потим шлїдзела блокада крижaню улїцох Маршала Тита и Русинскей, перше зоз писканьом и галайком, а потим зоз 16 минути цихосци.
После цихосци шицки присутни достали пригодни налїпки котри символизую студентски вимоги и нєзадовольство зоз актуалну ситуацию, а котри потим полїпени на огласни табли у валалє.
Людзе ше прешейтали у колони и полїпели налїпки лєм на огласни табли, по розказу младих котри дзелєли налїпки, строго було забранєне лїпац на други места.
Протест, сход и шейтанє прешло без инцидентох. Блокаду крижней драги контроловали два полицийни патроли, док за шейтанє през валал була задлужена єдна патрола.
