У финишу випущена побида

автор З. Колєсар
226 Опатрене

БАЧКЕ ДОБРЕ ПОЛЬО – На стадиону домашнєй екипи ФК „Сутєска”, ґол за Искру дал Янкович и стретнуце закончене зоз резултатом 1:1.

Госцованє у Бачким Добрим Полю за Искру вше було чежке, бо ридко кеди зазначела позитивни резултат. Медзитим, внєдзелю Искра була фаворит процив домашнєй екипи з оглядом же на тото госцованє пришла як лидер на таблїчки.

Искра лєпше отворела стретнуце и од початку ше намагала тримац лабду у ногох и диктирац темпо. Домашнї у тим периодзе мали два вигодни шанси. Перша була зоз шлєбодного бица котре Искров ґолман Ступар одбранєл з ногу, а друга була найлєпша можлїва, зоз пеналу.

У першим полчасу и Искра мала два вигодни шанси за ґол. Єдно бице Искрового бавяча уж шицки видзели у ґолу, лабда прешла попод ґолмана, алє одскочела и прескочела празни ґол. Нєодлуга потим Искров центарфор Комазец ше пребил по правим боку, центрирал, алє лабда нє дошла до Янковича.

У другим полчасу Искра змоцнєла прицисок на ґол Сутєски и лєм було питанє кеди охрана домашнїх попущи. То ше случело уж после двох минутох бависка у другим полчасу. Комазец добре наруцел лабду, а найвисши у скоку бул Данило Янкович котри з главу дал ґол и принєсол Искри предносц.

Намагали ше домашнї после приятого ґола виєдначиц, медзитим, шицки нападаня Искрово бавяче застановйовали на 20-30 метери од ґолу. Кед уж шицки на стадиону лєм чекали конєц и нову Искрову побиду, домашнї виєдначели. У 87. минути домашнї вихасновали вельку гришку, по теди одличного, ґоламана Ступара котри нєпотребно вибегнул на єдну наруцену лабду котру нє долапел, а котру до празного ґолу уруцел єден бавяч Сутєски. Нєодлуга судия пискал конєц та Искра у остатнїх хвилькох випущела вельку побиду.

За Искру бавели: Ступар, Колошняи, Роґанович, Сердар, Малацко (Лазетич), Комазец, Мачиженски, Янкович, Бодонї, Милованович (Суботич), Неделькович (Нешкович).

После штирох одбавених колох Искра єдина зазначела три побиди и єден нєришени резултат, та тераз перше место на таблїчки дзелї зоз Сенту. Обидва екипи освоєли по 10 боди. У шлїдуюцим колу Искра ознова будзе бавиц општински дерби понеже у Коцуре дочека екипу ФК „Пролетер” зоз Равного Села.

ПОВЯЗАНИ ТЕКСТИ