КОЦУР – Швето Богоявленє Господнє – Трокралї означене у Грекокатолїцкей церкви Успения Пресвятей Богородици у Коцуре.
Вельку Службу Божу, вчера 19. януара, служел декан бачки и парох коцурски о. Владислав Рац, а як визначел, з нагоди того швета треба же бизме ше шицки здогадли подїї кед Йоан Креститель покресцел Исуса у рики Йордан.
Воду ше пошвеца на швето Богоявленє каждого року, а пошвецанє з тоту воду знак Божого благослову, же би була на хасен духовному и тїлесному здравю шицким парохияном. Числени вирни коцурскей грекокатолїцкей парохиї принєсли и свойо канчови и фляши з воду котру на концу Служби парох о. Рац пошвецел.



З пошвецену воду парох о. Рац пошвецел цалу церкву и шицких присутних вирних, а по законченю Служби, парохиянє могли присц и набрац себе води и зоз судзини у котрей є пошвецена однєсц до своїх домох.
З воду пошвецену на Богоявленє будзе и традицийне пошвецанє обисцох, котре почнє нєшка, 20. януара, и будзе тирвац по конєц мешаца, односно по 30. януар.
