КИЄВ (УКРАЇНА) – Енциклопедия сучасней України (ЕСУ), чий перши том видруковани 2001. року, нєшка найвекша українска енциклопедия, котра облапя период од початку 20. столїтия до нєшкайших дньох. Єй реализатор Институт енциклопедичних виглєдованьох Националней академиї наукох України вєдно з Науковим товариством „Шевченко”.
У 2022. року бул пририхтани и видани 24. том Енциклопедиї сучасней України. Вон уключує букву „О”, ма 3000 статї и понад 2900 илустрациї. Як и у предходних томох, часц статьох пошвецена заходним и восточним дияспором, окреме Руснацом и Українцом Заходного Балкану. У 24. тому опубликовани статї-персоналиї о Якимови Олеярови, Янкови Олеярови, Любици Отич, Петрови Овадови, а тиж и статя о месту Осиєк.
Попри друкованого виданя, Енциклопедия сучасней України од 2014. року ма електронску верзию https://esu.com.ua
Од 2023. року особлївосц пририхтованя енциклопедиї постало тото же у електронскей верзиї представени нє лєм томи цо уж вишли з друку, алє тиж и статї з томох котри ище нє опубликовани.
Так, у електронскей верзиї ЕСУ обявени статї о Дюрови Павичови, Меланиї Павлович, Владимирови Паланчанинови, Дюрови Папгаргайови, Велимирови Паплацкови, Ангели Прокоп, Михайлови Рамачови, Юлиянови Тамашови, о валалу Петровци и месту Прнявор.
На початку 2023. року на сайту Енциклопедиї сучасней України були уведзени вецей технїчни иновациї. Медзи иншим, злєпшана функционалносц сайту, злєпшани алатки за преглєдованє. Статї мож найсц у общим глєданю, у списку томох або у списку тематичних оддзелькох. Створени профили авторох до котрих ше автоматично додаваю обявени статї, а тиж ше провадзи и число преглядох.
Обще число авторох енциклопедичних статьох у електронскей верзиї ЕСУпонад 23 тисячи. Авторе (коавторе) статьох о Руснацох и Українцох Заходного Балкану: Наталия Стаценко (68 статї), Микола М. Цап (32). Олекса Мишанич (13), о. Роман Миз (9), Дюра Латяк (4), Микола Мушинка (3), Дюра Винаї (3), Ана Римар Симунович (2), Звонко Костелник (1).
Спрам статистики служби Google Analytics, цеком 2023–2024. року у електронскей верзиї ЕСУ найвекше число преглядох мали тоти статї:
Микола Мушинка (227), Войводина (109), Олекса Мишанич (81), Михайло Ковач (59), Крижевска епархия (49), Бачка (48), Роман Миз (46), Михайло Малацко, Осиєк (36), Нови Сад (35), Коцур, Янко Олеяр, Юлиян Тамаш (32), Владимир Костелник, Яким Олеяр (31), Иван Ковач, Велимир Паплацко (30).
Общи корпус статьох онлайн-верзиїЕСУ нєшка понад 74 тисячи гасла, цо надїйне жридло за сиґурну информацию о Українцох у України и швеце у 20-21. столїтию.
У 2024. року електронска верзия ЕСУ унєшена до Реґистру субєктох у сфери онлайн-медийох України и достала идентификaтор R40-04801 (ришенє Националней ради України з питаньох телевизиї и радия од 30.05.2024 року). Енциклопедия сучасней України индексує ше з платформу наукових публикацийох Google Scholar.
