НОВИ САД – У найновшим 36. чишлє „Руского слова” у рубрики Тижньовнїк висти спред Одбору за образованє Националного совиту Руснацох же у Суботици вибрана школа у хторей будзе орґанизована виборна настава руского язика.
На бокох Нашо места звит о схадзки Скупштини городу Нового Саду на хторей вибрани городоначальнїк Милан Дюрич, а медзи опозицийнима одборнїками и двоме Руснаци.
У рубрики Економия актуална ламачка кукурици у Општини Вербас, дзе по думаню велїх парастох урожай преполовени.
На бокох Култури и просвити вецей у статї о нєдавно отриманей 39. Културней манифестациї „Миклошевци 2024”, док фокус рубрики на новим школским року и першокласнїкох у школох дзе ше настава одвива на русим язику.
Репортажа о Янкови Планчаковому Бобекови з Руского Керестура зазначена на бокох Людзе роки живот. Ту и напис о будинку, керестурским Замку, своєродним символу валала.
У рубрики Духовни живот слово о Кирбаю у Коцуре, хтори 28. авґуста, зоз Архиєрейску Службу Божу Коцурци преславели у церкви Успения Пресвятей Богородици, истого дня преславени Кирбай и у Бикичу.
У рубрики Спорт вше актуални фодбал и одбавени змаганя и резултати, у тижню отримане и змаганє у спортским риболове, а ту и вистки о успиху учашнїкох на Параолимпийских бавискох у Паризу.
И у тим чишлє на бокох Интермеца представяме наших уметнїкох, з тей нагоди Силвестера Д. Макая з Коцура. Рецепти у стаємней рубрики Хладок и горуци тепши, а Додатки у тим чишлє Дикица и Мозаїк.