РУСКИ КЕРЕСТУР – У Парохия св. отца Миколая зоз Службу Божу у Водици на 10 годзин, раншу Службу на 8 и вечаршу на 19 годзин, означене швето Успения Пресвятей Богородици, у народзе волане Велька Матка Божа.
Службу служел декан бачки и парох коцурски о. Владислав Рац, а вєдно з нїм и парох керестурски о. Владислав Варґа, капелан о. Владимир Медєши и госц зоз Паризу о. Славко Чизмар. Споведали помоцни капелан крестурски и парох идїйски о. Михайло Шанта и капелан о. Ярослав Варґа.
На початку Служби керестурски парох визначел єй намиренє, а то молитва за шицких котри подаровали и буду даровац на вибудов центру „Емаусˮ, та молитва и благослов за початок покладаня громобрану, цо робота котра ноши зоз собу и опасносц.
Наказовал госц зоз Французкей о. Славко Чизмар, котри визначел же приход ґу Мацери Божей до Водици вше дава можлївосц побешедовац зоз ню и з Господом Богом, котри любов, а ми му любов маме врациц. Досц ше лєм намеяц єден другому, повесц красне слово и так давац Господу славу.
