РУСКИ КЕРЕСТУР – Руски народни театер „Петро Ризнич Дядя” всоботу, 11. марца у велькей сали Дома култури успишно други раз виведол представу „Метаморфози”.
Премиєра представи була на Драмским мемориялу Петра Ризнича Дядї у новембру, та и гоч прешло досц часу од першого по друге виводзенє, ґлумци го вихасновали и добре увежбали виводзенє.
Пред початком на уходзе до сали Дома култури була гужва яку ше давно нє видзело. Публика, очиглядно жадна квалитетних културних збуваньох, попонагляла завжац место.
Ансамбл и публика од початку дихали вєдно, а то резултовало зоз добру реакцию публики на збуваня на бини. Така потримовка поцагла ґлумцох, та дали шицко од себе же би представа цекла питко, убавено и розбавено.
Було праве уживанє буц у Доме култури всоботу вечар, публика на стояцо аплаудовала ґлумцом котри два раз виходзели на бис.
