Вельконоцни концерт у Петровцох (фото)

автор И. Лїкар
141 Опатрене

ПЕТРОВЦИ (ГОРВАТСКА) – Внєдзелю, 31. марца з нагоди Велькей ноци КУД „Яким Гарди” Петровци орґанизовало Шветочни вельконоцни цаловечарши концерт.

Програма почала на 19:30 годзин у Доме култури. На початку нащивительох привитал предсидатель Културно-уметнїцкого дружтва Звонко Костелник, а перши наступели наймладши, Яков и Каролина Седлак зоз шпиванку „Панонска ровнїно”, на гармоники их провадзел Мартин Седлак.

Хлопска шпивацка ґрупа одшпивала вецей шпиванки у провадзеню оркестра дружтва. Фолклорна ґрупа ше представела зоз пейцома танцами, а наступел и Михайло Голик як солиста и як дуо зоз Аню Грищук.

Публики замерковала точку Михаила Грищука и Анамариї Алекси, котри одшпивали шпиванку „Я тебе нє рада”. Поета, Томислав Кетелеш пречитал вецей свойо писнї, а на концу програми парох петровски о. Владимир Седлак подзековал публики же пришли потримац роботу Дружтва, а потим учашнїки и публика одшпивали „Многая лїта” з надїю же ше успишна робота предлужи и на далєй.

Шветочни вельконоцни концерт финансийно потримал Совит за национални меншини Републики Горватскей.

ПОВЯЗАНИ ТЕКСТИ