РУСКИ КЕРЕСТУР – Керестурска парохия св. Миколая тей нєдзелї видала нове число християнского часопису за децембер. Тото виданє у духу крачунских шветох, та у уводнїку и Крачунска винчованка на руским и українским язику кир Георгия Джуджара.
Як ше вирни духовно пририхтую за Рождество, свойо намаганя призначели монахинї, млади мацери, привреднїки, старши особи и други, цо може буц надихнуце за читачох же би и вони на таки способ дочекали тото швето. Призначене и як керестурски парохиянє шлїдза приклад свойого заступнїка св. Миколая. Духовни шведоченя и на бокох о Марийовим святилищу Водици, а на тих бокох и Молебен преложени на руски язик.
Потолкована и история Крачуна и обичаї, а вецей авторе описали и його духовне значенє.
И у тим виданю текст з историї нашей Церкви, алє и значни подїї за Церкву у швеце и по наших парохийох.