З Марийовима ласками

1.7k Опатрене

ТЕКИЇ ‒ Зоз грекокатолїцку Службу Божу, пополадню 4. авґуста, означене швето Шнїговей Мариї на Текийох, медзи богослуженями на других язикох и з припаднїками рижних етнїчних заєднїцох.

Нашу Службу Божу служел парох новосадски о. Юлиян Рац, а Апостол од святого апостола Павла пречитал и дзияковал Йовґен Надь.

У своєй казанї парох о. Рац гварел же нас дочекала Мац Божа, хтора нас нїґда нє зохабя ‒ з нами є и кед чежко и кед нам лєгчейше.

По його словох, тераз, наш час познати по зраженьох, нєвирствох и нєсиґурносци и прето треба глєдац добри приклади и правдиви вредносци.

Мария нам приклад, вона дава моц, поцешенє, любов и помоцнїца є при спашеню. Прето, треба ше єй модлїц и буц отворени за єй ласки.

Вироятно пре пандемию и горучаву, на Текийох було менєй людзох як скорей. На нашей Служби Божей найвецей було Новосадянох, алє пришли вирни и зоз Руского Керестура, Коцура, Дюрдьова, Футоґу, а провадзели ю и паломнїки зоз других местох.

ПОВЯЗАНИ ТЕКСТИ