НОВИ САД – З нагоди Националного швета Руснацох, НВУ „Руске слово” обрадовало читачох зоз архиву виданьох доступну за безплатне преберанє.
На сайту Установи, у горнїм лївим куце, под назву диґитализация, находза ше виданя новинох „Руске слово” (2018-2025), часописа за дзеци „Заградка” (2020-2025), часописа за младих МАК (2020-2025), часописа за науку, литературу, културу и уметносц „Шветлосц” (2020-2025), як и дзепоєдни кнїжки чийо тиражи уж розпредани.
Тиж, за кажде виданє обявени и його перши прикладнїк.
Шицки виданя мож превжац до свойого компютера у ПДФ формату так же ше отвори одредзене виданє и у правим горнїм куце кликнє на сличку стрелки цо указує на долу.
Безплатна диґитална архива виданьох часц Документацийного центеру НВУ „Руске слово”, на котрим робела веб-редакторка Ясмина Дюранїн.
Тоту архиву ше будзе дополньовац през рок зоз старшима виданями, а початком каждого року ше уруци архиву за прешли рок.
Як розконарена архива виданьох, Документацийни центер НВУ „Руске слово” основани 2020. року на ювилей 75-рочнїцу фирми и отворени є за явне хаснованє. Документацийни центер НВУ „Руске слово” составени зоз двох корпусох: єден у Новим Садзе и други у Руским Керестуре, а состойна часц им пейц секциї: 1) Архива шицких друкованих виданьох НВУ „Руске слово” од 1945. року, 2) Библиотека Видавательней дїялносци НВУ „Руске слово”, 3) Архива фотоґрафийох „Руского слова”, 4) Диґитална архива шицких виданьох и пририхтованьох и 5) Збирка наградох НВУ „Руске слово”.