ДЮРДЬОВ – Вчера, 12. фебруара, у Дюрдьове знята епизода за сериял „Красоти розличносци”, нєзависней продукцийскей хижи за потреби РТС-у. У емисиї буду представени живот, култура и обичаї Руснацох хтори жию у Дюрдьове.
На початку знята Служба Божа у церкви. После того, дюрдьовски парох о. Михаил Холошняй бешедовал о нашей, грекокатолїцкей вири, а потим знята и Руска одлога у Дюрдьове. Указане як ше рихта нашо национални єдла – белюши, геровци, капушнїки, ґоргелї, сирец и бобальки.
Члени виводзацкого фолклору з тей нагоди одтанцовали два танци „Пред нашима дзверми” и „Гуцулка”, а дзивки зоз Дзивоцкей шпивацкей ґрупи одшпивали шпиванки „Бетяр дзивочка” и „Од Кракова”. На концу, знята и крадка сличка зоз представи „Меркуй, жени!”, хтору прешлого року пририхтали члени Драмскей секциї Дружтва.
Сериял „Красоти розличносци” почнє ше приказовац од яри, а теди ше годно одпатриц и епизоду хтора знята у Дюрдьове.
