РУСКИ КЕРЕСТУР – У Основней и штреднєй школи з домом школярох „Петро Кузмяк” як и у шицких школох у Сербиї, вчера 27. януара зоз пригодну програму означена Школска слава – дзень св. Сави, защитнїка просвитних установох.
Програма у школским голу отворена зоз гимну пошвецену св. Савови и школскей слави котру виведол школски хор, а потим школярох, просвитних роботнїкох, занятих и госцох привитала директорка Школи Наталия Будински котра шицким повинчовала тот дзень.


О живоце, духовносци и просвитительскей роботи св. Сави у пригодних текстох на сербским и руским язику присутним интерпретовали школяре рижних возростох, од першей класи Основней школи по штредньошколцох, котри и зоз своїма талентами за гранє и шпиванє возвеличали тоту шветочносц.




На концу представителє Сербскей православней церкви, на чолє з парохом у Кули Драґолюбом Майсторовичом окончели обряд пошвеценя и ламаня славского колача и жита, а молитву Оченаш предводзел капелан керестурскей грекокатолїцкей парохиї о. Ярослав Варґа. Свяшенїк Майсторович директорки, просвитним роботнїком и школяром тиж повинчовал тот дзень и поблагословел шицких.
На програми бул присутни и предсидатель Општини Кула Дамян Милянич.
