БАЧИНЦИ/СРИМСКА МИТРОВИЦА – Ище вше тирваю роботи на оправяню церквох, после чкоди яку направела велька нєпогода, хтора ше случела влєце.
У Бачинцох на Церкви святого апостола и евангелисти Луки положени нови уходни дзвери на место дзверох хтори очкодовани у нєпогоди хтора ше влєце случела. О. Дарко Рац гварел же оправена и часц очкодованого закрица, пременєни роги и греди, оправена очкодована часц повали. Тоти роботи поробела самостойна ремеселнїцка роботня „Кронос“ зоз Вершцу. Од векших роботох остало санирац горню часц турнї, хтору моцни витор повалял. Шапку турнї зоз новим крижом, хтори будзе позлацени з 18-каратним златом ше положи на яр, док будзе красша хвиля.
У Сримскей Митровици на Церкви Вознесеня Господнього стари дотирвали шалукатри, хтори стали од кеди збудована церква, заменєни з новима. Грекокатолїцка парохия у Сримскей Митровици основана 1886. року, а церкву почали будовац 24. септембра 1905. року, а иконостас поробени о рок, 1906. року, та вироятнє теди положени и шалукатри на церкву. Нови шалукатри направела будовательна фирма Страценски, хтора дала дески, а фирма Ходоба финансовала шицко цо попри древа требало за виробок шалукатрох.
Парох сримскомитровицки о. Иґор Вовк поблагословел нови шалукатри пред кладзеньом на церкву. Тот вельки проєкт давно плановани и тераз є конєчно поробени, а з нїм ше закончує роботи на церкви того року.
