Поховани дюрдьовски парох о. Йоаким Холошняй

автор сас
1.2k Опатрене

ДЮРДЬОВ – Зоз Службу Божу и парастосом у грекокатолїцкей церкви Рождества Пресвятей Богородици у Дюрдьове вчера, 21. марца дополадня почал обряд хованя протоєрея ставрофора о. Йоакима Холошняя, дюрдьовского пароха, котри на тей длужносци службовал 46 роки, як и бачкого декана. О. Холошняй ше упокоєл внєдзелю, 19. марца.

Службу предводзел наш апостолски еґзарх владика Георгий Джуджар, а сослужовали штернац священїки з нашого Еґзархату и з Горватскей.

Апостол читали о. Борис Холошняй, вироучитель Данил Задрепко, як и дакедишнї и терашнї виронаучни дзеци з дюрдьовскей основней школи Константин Чордаш, Єлена Горняк и Лука Кухар. На Служби шпивали Хор „Розанов” и члени Хору з Холошняйовей фамелиї.  

О роботи о. Йоакима Холошняя у дружтвеней заєднїци, у култури, у Дюрдьове и ширше, як и його душпастирскей роботи бешедовали представитель Церковного одбору дюрдьовскей церкви и КУД „Тарас Шевченко” Владо Кухар, представителька Хору „Розанов” Любка Тиркайла, предсидатель Општини Жабель Чедомир Божич, як и владика Георгий Джуджар.

– На хресну духовну нєдзелю рано донєсол до конца свой хрест священїк Христов о. Йоаким Холошняй. Закончел жемску драгу свого священїцкого служеня, свойого живота и служеня Богу, церкви и народу. Кед сом го нащивел, гварел ми же док оцеплєє и док му будзе лєпше, та ше ошлєбодзи од служби. Оцеплєло, алє сам Бог го ошлєбодзел – гварел кир Георгий.

– Служби окончовал вирно, точно и совисно. Єдини сам Бог зна кельо служби Божо одслужел, кельо раз наказовал слово Боже за спашенє душох, келї з нас прейґ його рукох глєдали од Бога одпущенє грихох, келїх покресцел, повинчал и келїх випровадзел до живота вичного. Тераз ми його випровадзаме на тоту драгу, придаваме його душу до рукох милосердного Бога – гварел владика Георгий Джуджар.

По Служби, процесия по главней драги ишла по грекокатолїцки теметов, дзе на уходзе ґу каплїчки, у першим шоре з правого боку, о. Йоаким Холошняй поховани.

Почитованого дюрдьовского пароха и нашого священїка на його остатню драгу випровадзели числени вирни и гражданє, нє лєм з Дюрдьова, алє и з других наших местох. На хованю були и дюрдьовски и жабельски православни парохове, шестри служебнїци з наших парохийох, представителє здруженьох и локалней власци, просвитни роботнїки и школяре з дюрдьовскей школи, як и вирни з православних парохийох з вецей местох.

 

ПОВЯЗАНИ ТЕКСТИ