ВЕРБАС – Урядови початок сезони зогриваня котри наступел 15. октобра у шицких городох у Сербиї єдино цепларня у Вербаше дочекала нєпорихтана.
Пред початком сезони зогриваня, зоз ЯКП Стандард вишло обвисценє спрам котрого хасновательом упутене пребаченє прето же зогриванє у тей општини нє почало у законским року, и як теди визначене, жимни радиятори були пошлїдок одлукох и поступаня руководства Општини Вербас.
Спрам остатнїх обвисценьох Штрайкацкого одбору ЯКП Стандард Вербас, зоз општинским руководством його представнїки отримали схадзку и усмено винєсли свойо вимоги. Визначене було виплацованє шицких седем нєвимирених заробкох зоз шицкима законским каматами, порядне виплацованє шицких наступних мешачних плацох у рокох котри предвидзени зоз Колективним контрактом и Законом о роботи, а тиж и писани Предклад мирох котри злєпшаю ликвидносц подприємства, як и злєпшанє условийох за роботу. Як Штрайкацки одбор того вербаского подприємства информовал явносц, потераз сполнєна лєм перша вимога, односно часточно виплацени нєвимирени заробки. Роботнїки и надалєй остали при вимогох Одбору и у штрайку, зоз минималним процесом роботи од 20 одсто.
Роботи на ремонту пошореньох почали 20. октобра, же би ше, як визначене у обвисценю, цо скорей оспособела система за початок сезони зогриваня, алє датум початку випоручованя цеплотней енерґиї у цалим городзе нє прецизовани.