У чаше кед вше вецей случованя патриме на малих екранох, концерти єдни з ридких збуваньох на хторих емоциї мож дожиц на живо. Велїм младим людзом вони нє лєм забава, алє и простор за виражованє, ошлєбодзованє и повязованє. На нїх час станє, там людзе нашмеяни и  кажда нота постава искра хтора у нас будзи енерґию. Концерт нє лєм збуванє, алє є и дожице, заєднїцтво, хвилька кед забуваш на каждодньови живот и кед ше препущуєш звуку, музики, шветлом и емоцийом. На нїх можеш буц цалком таки яки ши, и там нїхто нє патри як танцуєш, шпиваш, або як ше облєкаш. На концертох ши часц чогошик векшого, того цо це порушує и здогадує же яки живот може буц красни и весели кед  жиєш зоз „полнима плюцами”.

Уж сом раз и написала у МАК-овим лексикону же, дефинитивно, найвецей пенєжи трошим на концерти (нє бануєм ). Була сом наисце на велїх концертох, у Сербиї, Горватскей, Нємецкей и у Америки. Концерти хтори сом нащивела то Плави оркестер, Тони Цетински, Дино Мерлин, Гари Мата Гари, Єлена Розґа, André Rieu, Sam Smith, Adel, The Coldplay, AC/DC, Imagine Dragons.

Так настал мой драгопис по концертох, а у шлїдуюцих шорикох сце годни пречитац хтори мойо особни фаворити:

1.     Адел

Вше ми була и будзе число єден, та сом прето и нащивела єй два концерти. На першим сом була у Лас Веґасу, у авґусту 2023. року, кед сом була на програми Work&Travel. Пред пейцома-шейсцома роками сом гварела мами же раз у живоце пойдзем на єй концерт, без огляду на тото кельо будзе коштац карта и дзе ше будзе отримовац. Наисце сом нє думала же ми ше так швидко виполнї тот сон.

Тот дзень кед ше отримовало концерт сом була барз емотивна. Пополадню сом ше купала у базену, а коло мнє були лєм палми и вельки будинки готелох. Була сом подзековна себе же сом ту, у центру самого Лас Веґасу, пре мойо намаганє, сцелосц за роботу и пре жажду уживац у живоце.

Теди сом ше аж и розплакала, бо сом посцигла успих и бо ше ми витворели сни. Потим сом ше позберала и пошла до готелу рихтац ше. Сцигла сом до Цезаровей Палати, дзе ше отримовало концерт. Вшелїяк, накадзи сом вошла до сали, ознова сом ше розплакала, и през цали цалючки концерт сом плакала и була подзековна на тим цо ше случує. Адел ме обчаровала пре елеґанцию, становиско и, вшелїяк, глас хтори чаривни и нєстварни. Окреме ми значело и же сом ю могла видзиц зблїзка, понеже сом була у дзешатим шоре. Виплацело ше.

Други єй концерт сом нащивела у Минхену, у Нємецкей, у авґусту 2024. року. Теди сом надумала же ми авґуст будзе резервовани за Адел, без огляду на тото кеди и дзе будзе мац концерт. Там сом купела карту за вельо менєй пенєжи, алє сом нє була напредку на концерту як першираз, бо сом сцела видзиц и других 80000 людзох як уживаю у атмосфери. Розлика медзи тима двома концертами була и у моїм „плаканю”.  У Нємецкей сом плакала на два-три писнї и нє було ми ясне же чом то нє так як першираз кед сом була. Познєйше сом вельо роздумовала о тим и похопела же сом од тей хвильки у Лас Веґасу, по Минхен, постала барз подзековна и на малих стварох, нє лєм на вельких. Почала сом наисце уживац у каждей каждучкей хвильки свойого живота. Лас Веґас ми бул опомнуце же ше живот случує каждодньово, нє лєм у одредзених хвилькох.

Атмосфера на обидвoх концертох була нєстварна, и зоз словами ю нє мож описац.

2.     The Coldplay

3.     Imagine Dragons 

Кед зме видзели рекламу, пайташ и я  купели карти вецей як пол рока пред концертом хтори бул у Будапешту.

На початку зме нє знали анї як там пойдземе, анї кельо днї останєме. Важне нам було лєм достац карти.

Одприлики два-три тижнї пред концертом зме резервовали змесценє на сайту Booking. Сцели зме же би змесценє мало паркинґ, же би було блїзко при гали дзе бул концерт, и же би нє було драге. На концерт зме сцигли з помоцу єдного дїда, хторого зме стретли док зме чекали трамвай. Вон нам потолковал и по анґлийски и по нємецки, та нас на концу и одведол скоро по галу. Приємно зме ше нєсподзивали, прето же нам старши вше гуторели же людзе у Мадярскей нє сцу бешедовац други язики окрем мадярского. Випатра єст и винїмки. На концерту нам дакус було напорно, бо зме пошли вельо скорей же бизме завжали добри места. Чекали зме, одприлики, три годзини опрез огради на слунку, стали зме, шедзели, и шпацирали ше на змену. Кед ше отворело капуру, шицки людзе почали бежац, та и ми з нїма. Вошли зме до гали, пайташ нам бул купиц вина, и почала „нова тура” чеканя концерту, котра тирвала ище два годзини. Док зме чекали, шедзели зме на жеми и упознали зме ше зоз Полякинями хтори бавели карти, та и нас научели. Тото бависко було таке компликоване же сом го забула такой як почал концерт. На концеру зме були у трецим шоре од бини, скакали зме и шпивали кельо зме лєм могли. Ноги и гарло нас болєли два днї после концерту, алє нам то нє було важне.

Щиро, знала сом же нам будзе добре. Пайташ бул першираз на таким вельким концерту и, поправдзе най повем, вон знал вецей писнї як я. Такого щешлївого сом го ище нїґда по теди нє видзела. Єдну хвильку будзем паметац до конца живота. Главни шпивач, Ден Рейнолдс, нам толковал же му пред каждим наступом придзе даяка думка на розум, и вон ю повторює як мантру през цали концерт. Того дня му пришло на розум I have everything I need, thank you, або „Mам шицко цо ми потребне, дзекуєм вам”. Тото виреченє нам повтройовал през цали концерт и наисце ми остало у паметаню.

Наисце треба буц подзековни за шицки подїї хтори зме дожили у живоце, як и за материялни ствари хтори маме.

Модлїм вас,

пренайдзце дацо цо вас виполнює, цо вам приноши щесце, радосц и забаву, чи то концерти, шпацирац ше, бежац, тренирац, дружиц ше, писац, робота, акциї ушорйованя, орґанизовац роботнї, учиц нови язик, путованя, виглєдовац, шпивац, або грац на инструменту. Наисце гоч цо. Робце тото цо любице и найдзце часу за себе. Кед зме себе добри, добри зме и другим. Нашо одношеня буду квалитетнєйши. Робце на тим же бисце були щешлїви, радосни и весели. Нїхто вас за руку нє будзе цагац. Сами ше таргнїце и одлучце буц задовольни.

Верце ми же мож.