РУСКИ КЕРЕСТУР – Того року орґанизовани одход на „Русински фестивал” до Свиднїку у Словацкей, котри будзе тирвац од 21 по 27. май.
На Фестивал ше руша на штварток, 24. мая на 22 годзини зоз Руского Керестура, а автобус зайдзе по путнїкох до Вербасу, Коцура и Нового Саду. Враца ше на нєдзелю вноци, так же хто роби будзе на роботи пондзелок, 28. мая.
Пияток, 25. мая, дополадня ше зайдзе до Кошицох и Прешова. Вечар почина Фестивал у Свиднїку. На соботу, 26. мая, ше идзе до Бардейова, Бардейовских Купельох, на Дуклю опатриц древени церкви, а на вечар ше будзе провадзиц програму на Фестивалу.
На нєдзелю, 27. мая, дополадня ше пойдзе до церкви, на 14 годзин почина програма и тирва до 18 годзин, а вец ше руша дому. Зайдзе ше до Прешова до „Теска”.
Путованє, автобус, спанє и путнїцке осиґуранє коштаю 5 500 динари, а костиранє будзе на самим Фестивалу. Понеже остало ище лєм даскельо места, цо скорей ше треба явиц на телефон 063-863-7-863, контакт особа Олена Папуґа.