Аутизем, чи.. ?

автор каролина папуґа
1.1k Опатрене

Помали, алє сиґурно поставаме аутистичне дружтво. Чежко вообще найсц адекватне поняце котре би могло описац нагле траценє нормох и моралних вредносцох у дружтве. Найлєгчейше дефиновац причини. Зводзи ше на линию меншого одпору – „цо можеш нєшка, зохаб за ютре, а ютре уж тото шицко забудз”. То би була мантра сучасного живота. Сама сучасна психолоґия и инсистованє на инклузиї и прилапйованю окремносцох, отворели дзвери до другей форми девияциї у справованю. Форсира ше индивидуалносц зоз моцним акцентом же кажде дзецко окремне, цо у ствари и так, алє источашнє ше нє поставело гранїци дзе почина и дзе ше закончує тота окремносц, котра барз частво доводзи до нєпристойносци.

Кажда нєсташносц постава нормалносц и так ше створели през час резиґновани особи котри жию як зомбиї. Од силних инсистованьох на шлєбоди и правох, забули на свойо обовязки и длужносци. Нач най ше дзецко трапи? Мама, або тато покончи место нього шицко цо треба. Праве пре таки причини нєшка аутизем и вшелїяки дияґнози зоз спектру первазивних розвойних поремеценьох постали нормалносц, а з тим и наша реалносц. Кед ше допущує карменє опрез ТВ-а, такой по тим ше бомбардує дзецко зоз рижнима ґаджетами, лєм же би одредзени час було мирне, ту ше такой може найсц и виновнїк за гистерични напади дзецка котре други нє розумя. Шицко то почина у вчасних рокох, кед починаю перши звади и битки за место при парнякох. Кед ше замодлї родичох же би обрацели увагу на справованє їх дзецка, исти родитель здушнє почина бранїц власне дзецко же воно нє таке, дома є добре и з тим завера очи пред проблемом прето же, озда, так лєгчейше.

И так тото добре дзецко вираста до обичного еґоцентрика и постава нєодвичательна особа, без почитованя других, психични и физични насилнїк. Неґативна увага нєшка постала масовна потреба, покарма за охорени глави. Досцигла ше критична маса, а шицки ше нашли на драги дзе назад вецей нєт. Од аутизма ше украдло главну характериситику же би ше на даяки способ оправдали препущеня у воспитованю и прави проблем настал кед ше пермутовали тези „нєвоспитане дзецко” од наисце хорого дзецка.

Шицко цо нам тераз остало, то же бизме ше чудовали и часто були нєсподзивани. Створени системи дзе епитет „окремни” достал неґативну конотацию, а вец ше ище и аґресивно инсиситує же би ше прилапело тоту (нє)нормалносц. У шицким тим ше анї нє нагадує же нас здрави розум давно зохабел, а кажде насилне инсистованє же би ше то прилапело убива кажду спонтаносц при людзох. Аж тото кед кулминує у дружтве приводзи до вше частейшей ескалациї и общей анархиї.

Становиска висловени у тим тексту виключно авторово и нє вше одражую ушорйовацку политику новинох „Руске слово”.

ПОВЯЗАНИ ТЕКСТИ