Виберанки за предсидателя Сербиї 2. априла

автор бета/зам
934 Опатрене

БЕОҐРАД – Предсидателька Скупштини Сербиї Мая Ґойкович вчера, 2. марца, розписала виберанки за предсидателя Сербиї, хтори буду 2. априла. По розписованю виберанкох, Ґойковичова гражданох поволала же би вибрали найлєпшого кандидата, котри озбильно и одвичательно будзе сотрудзовац з Владу Сербиї у борби за очуванє политичней и економскей стабилносци держави.

Предсидательним кандидатом поручела же би почитовали гражданох и обрацали им ше з квалитетнима програмами, а гражданох поволала же би 2. априла вишли на виберанки и зоз своїм гласом одлучели хто у шлїдуюцим мандату будзе предсидатель Сербиї.

Одлука о розписаованю виберанкох за предсидателя держави будзе полноважна з єй обявйованьом у „Службеним глашнїку Сербиї”, кеди почню и термини за виберанково активносци.

Кандидатох за предсидателя держави можу предложиц реґистровани политични странки, коалициї и ґрупи гражданох а за кандидованє потребни найменєй 10 000 оверени подписи виберачох. Кандидатуру ше Републичней виберанковей комисиї придава найпознєйше 20 днї пред дньом виберанкох.

За предсидателя Републики будзе вибрани кандидат котри достанє векшину гласох виберачох котри гласали.

Кед же анї єден кандидат 2. априла нє достанє потребну векшину гласох виберачох котри гласали, о 15 днї будзе отримани други круг виберанкох, на хторих участвую двоме кандидати котри достали найвецей гласи, а победзує тот котри достанє векше число гласох.

ПОВЯЗАНИ ТЕКСТИ