КОЦУР – Вчера у Велькей сали Месней заєднїци у Коцуре Фодбалски клуб „Искра” отримал Рочну скупштину, на хторей присуствовали коло 50 члени и симпатизере Клуба.
Звит о роботи у прешлим року поднєсол секретар „Искри” Здравко Бабич, котри оценєл же у прешлим року поробене шицко цо и виплановане. „Искра” ше пласовала до Подручней лиґи, у котрей є на концу єшеньскей часци перша на таблїчки, освоєла турнир у вельким фодбалу котри у рамикох СБ „Яша Баков” отримани у Руским Керестуре. Ґу тому, роботи на инфраструктури стадиона тиж успишно поробени.
Тренер Здравко Бабич, котри до пред конєц єшеньскей часци сезони водзел „Искру”, поднєсол звит о своєй роботи, а представени и нови тренер – Боривоє Абрамушич зоз Савиного Села котри наявел же пририхтованя почню 29. януара.
Финансийни звит блаґайни поднєсол Микола Сабадош, а финансийни звит котри Клуб достал од Општини Вербас и донацийох пречитал касир Владимир Цап. Звит о резултатох младших катеґорийох поднєсол тренер Желько Салонтаї.
На скупштини преглашени и найлєпши бавяч Искри у прешлим року, а тото припознанє достал Дамян Ґубаш.
Предсидатель „Искри” Радислав Сталевич наявел плани за тот рок, а то у першим шоре змоцнїц бавяцки кадер же би Искра и на концу сезону була на першим месце на таблїчки.
