РУСКИ КЕРЕСТУР – Вирни парохиї св. оца Миколая нєшка преславюю Перши дзень Рождества Христового – Крачун, хтори дочековали и вчера на Вилїю у своїх домох и у Катедралним храму на чолє зоз нашим еґзархом преосвященим владиком Георгийом Джуджаром.
На Вилїю дзеци и млади ходзели по обисцох колядовац и винчовац Крачун, а шицки вєдно парохиянє го торжествено витали на Всеночним хторе було на 23 годзин. Предводзел го владика Георгий зоз домашнїма и священїками з других наших парохийох.
Нєшка на Перши дзень, швето тиж преславене и на архиєрейскей Служби Божей хтору владика служел з домашнїма и священїками госцами, а хтору зоз своїм шпиваньом возвелїчал и Мишани хор Катедралней церкви св. оца Миколая и Дому култури под руководзеньом Лидиї Пашо.
Владика шицким повинчовал найрадоснєйше швето Рождества Христового и наглашел же Крачун то швето любови, мира и солидарносци.
На Служби Божей були велї парохиянє и їх госци, а медзи нїма и представителє Вивершного одбору (ВО) Националного совиту Руснацох.
Як уж традиция, по Служби Божей, предсидательм НС Руснацох Славк Рац, предсидатель ВО Желько Ковач и члени Йовґен Мудри и Наташа Миколка Еделински, у парохийним доме нащивели преосвященого владику кир Георгия Джуджара.