РУСКИ КЕРЕСТУР – Вирни керестурскей парохиї вчера преславели перши дзень найвекшого християнского швета – Воскресеня Христового – Пасхи, а нєшка на други дзень швета у шицких Службох Божих будзе и мированє.
Вчера на 10 годзин Архиєрейску Службу Божу предводзел наш владика Георгий Джуджар, а сослужели домашнї священїки парох о. Михайло Малацко и капеланє о. Владимир Медєши и о. Михайло Шанта.
Швичкаре були 12 члени Церковного одбору и двоме члени Здруженя ремеселнїкох и приватних поднїмательох, а апостол читал и шпиванє провадзел домашнї дзияк Янко Виславски.
Як то традиция на Пасху, Євангелске читанє священїки и владика читали на шейсцох язикох: на церковнославянским, греческим, латинским, руским, українским и горватским.
Владика у казанї повинчовал швето и визначел же Пасха значи преход, у Новим завиту з Исусовим воскресеньом – преход од шмерци до живота, прецо наша радосц вична.
– Так як Исус за нас умар и воскреснул, так жада же би и ми з нїм воскресли. Жичим радосци воскресеня Христового, прежиц го як побиду. Най нас ошвици шветло його воскресеня и най нас провадзи до вичного, щешлївого живота – повинчовал владика Георгий.
По Служби владика и священїки у обходу у церковней порти пошвецели и кошарки зоз пасхалним єдзеньом и присутних вирних хторих було у вельким чишлє, як домашнїх так и госцох.
Нєшка, на други дзень Велькей ноци, буду штири Служби Божо у Катедралней церкви, на 8, на 10, на 11,30 и на 19 годзин, а на 16 годзин будзе и Служба у манастире Малих шестрох на Циґлашоре. У шицких Службох будзе и мированє.
На треци дзень швета, Служби Божо буду як на швета, значи нє будзе дзецинска на 11,30 годзин.
Керестурци отримую и обичай облїваня, та нєшка на други дзень пооблївани буду дзивчата и жени, а ютре вони буду облївац леґиньох и хлопох.
