РУСКИ КЕРЕСТУР – Школа „Петро Кузмяк” вчера була домашня и другей ґрупи школярох з наших местох котри до Руского Керестура пришли патриц вчерайшу дзецинску представу на Драмским мемориялє Петра Ризнича Дядї.
На тот завод пришли школяре з Нового Саду, Петроварадину, Дюрдьова, Вербасу, Кули и з Нового Орахова котри руски язик виучую у порядней, лєбо виборней настави, зоз своїма наставнїцами. Приход школярох з наших местох орґанизовал и финансовал Одбор за образованє Националного совиту Руснацох, та як и вовторок,на першим таким стретнуцу, и вчера у Школи була предсидателька спомнутого одбору Мелания Римар.
Школу „Петро Кузмяк” нащивели пред патреньом представи, привитала их педаґоґиня Мария Шанта, а домашнї школяре им пририхтали полгодзинову програму на хторей рецитовали, шпивали и грали (школяре котри источашнє ходза и до керестурского оддзелєня ШОМО). У Школи мали часу и за бавенє на дворе, за полудзенок, а нащивели и Спортску галу.