ПЕТРОВАРАДИН – На тогорочней Пиятей конференциї продуковательох поживи и вина „Food talk 2017”, найвекшей у реґионє, хтора вчера, 9. юния отримана у ресторанє „Бескрай” у Петроварадину, у окремней програми манифестациї участвовали и члени Културно-уметнїцкого Дружтва „Тарас Шевченко” з Дюрдьова, котри представели часц свадзебних обичайох Руснацох у Войводини.
Конференцию пошвецену поживи и вину отворел подпредсидатель Покраїнскей влади и покраїнски секретар за привреду и туризем Иван Дьокович, а бешедоване о защити трошительох, туризме, ґастрономиї, здравей поживи и другим..
У окремней часци Конференциї представена часц свадзебних обичайох при Руснацох, о чим присутним бешедовала Маґдалена Надь з Дюрдьова, а члени КУД „Тарас Шевченко” були пооблєкани як млода и млоди, два свашки и дружка, котри указали нашо шветочне народне облєчиво. Надьова бешедовала о облєчиве, потолковала цо и хтори предмети ше ношело на свадзебни дзень, яки ше єдла предкладало на свадзби.
Програму водзела новинарка РТС Рада Дюрич, котрей ше окремно пачела бешеда о покрейткох хтори ше по свадзби палї же би малженство нє було претаргнуте.
Пред самим представяньом народного облєчива на членох КУД, у дворе ресторану заинтересовани могли видзиц и як ше облєка и чеше млоду за свадзбу.
Дзень пред тим, штварток, 8. юния, два фолклорни секциї КУД „Тарас Шевченко” з Дюрдьова участвовали на Седмим Медзинародни фестивалє фолклору и музики „Доволованє ровнїни” на Штранду у Новим Садзе.. З провадзеньом Тамбурового оркестру Дружтва, Младша фолклорна ґрупа одтанцовала танєц „Коломика” и одшпивали шпиванку „Тика-така”, а Виводзацка фолклорна ґрупа виведла танєц „Три гвиздочки на нєбе”.