КОЦУР – Промоция антолоґиї поезиї Дуга над валалом 2 / Дуга над селом 2, хтора обявена у рамикох проєкта Интеркултурална творчосц Руснацох Рускей матки, будзе у месней библиотеки Данило Киш, на пияток, 28. aвґуста, на 16 годзин.
Интеркултурална антолоґия Дуга над валалом 2 / Дуга над селом 2 обявена з нагоди 30-рочнїци Дуги над валалом 1, а зоз финансийну потримовку Министерства за людски и меншински права и дружтвени диялоґ и Управи за културу Города Нового Сада, дознаваме од главного редактора Дуги 2 и предсидателя Рускей матки проф. др Михайла Фейси.
З тей нагоди позберани твори поетесох и поетох хтори ше у периодзе од трох деценийох (Дуга над валалом/Дуга над селом селом 1 публикована 1995. року) стретали на поетских стретнуцох у Руским Керестуре и Коцуре. У обидвох виданьох ше тримало истого критериюма – кед поетеса/поета ма обявену збирку поезиї, обявени єй/му пейц писнї, а кед нє ма обявену збирку, вец два писнї. Поетеси и поетове сами виберали писнї зоз хторима су заступени у Дуги над валалом/селом 2, а тиж сами виберали и язик своїх писньох. Наявене же на присутни на промоциї достаню безплатни прикладнїк.