НЮЙОРК (ЗАД) – На яки способ концепт квантней технолоґиї пренєсц штредньошколцом прейґ метематики була тема преподаваня под назву „Математична кратша драга по квантну будучносцˮ хтору директорка Школи Петро Кузмяк, Наталия Будиснки, зоз Руского Керестура, представела на тогорочней медзинародней конференциї „MATRIX & IMAGINARY 2026ˮ, у Нюйорку.
Конференция отримана концом юлия, у Националним музею математики, а позберала числених фаховцох и познати мена зоз швета математики и науковей комуникациї.
Медзи главнима преподавачами були – Ґрант Сандерсон, автор популарного математичного Ют’юб канала „3Blue1Brownˮ, професор математики на Стендфорд Универзитету Тaдаши Токиеда, як и математичарка и наукова комуникаторка Талития Вилиамс. Окремну увагу прицагнул панел у хторим участвовали добитнїки Филдсовей медалї, а хтора, такповесц, пандан Нобеловей награди за математику – Манюл Барґава и Акшей Венкатеш.
Окремна вредносц конференциї була у тим же ше математику представело нє лєм як наукову дисциплину, алє як дацо цо поваязане зоз технолоґию и шветом хтори нас окружує, а Будинскова мала нагоду презентовац свойо идеї як би ше концепти зоз квантних технолоґийох могли пренєсц школяром у штреднєй школи прейґ математики.
Пребуванє у Нюйорку нє було резервоване лєм за преподаваня и фахово розгварки, алє орґанизаторе пририхтали и числени дружтвени активносци хтори учашнїком оможлївели же би ше упознали и звонка конференцийней програми.
