НОВИ САД – На Трецей програми радия Радио-телевизиї Войводини на програми по руски ютре, на нєдзелю, 23. авґуста, на 7 годзин рано годно послухац Емисию за валал, а на 12:30 г емисию Културна панорама.
Ютре у найновшим виданю Емисиї за валал будзе слова о уплїву високих температурох на ярнї култури, о урожаю и ценох. Жатва слунечнїку почала, урожай слабши, а цена нєизвесна. Паприґа у закончуюцей фази, а у керестурским хотаре парасти нє одуставаю садзиц тоту културу. У овоцнїку грушкох у вербаским хотаре тирва оберанє, а найвекше интересованє за вилямовку. У емисиї ше нє вихаби анї найновши висти зоз польопривреди, проґнозу хвилї за наиходзаци тидзень, як и цени польопривредних продуктох на новосадских пияцох.
Емисия за валал на програми кажду нєдзелю на 7 годзин рано и репризно стреду на 21:30 годзин, на УКТ габох радия РТВ на 92, 100 и 107,1 мгг, а мож ю послухац и на одложеним слуханю на сайту Радио-телевизиї Войводини. Емисию пририхтую Єлена Дудаш, Златко Колєсар, Михаил Рамач.
Потим, на 12:30 годзин у найновшей емисиї Културна панорама годно послухац як було керестурским аматером на Стретнуцу Керестурох у Румуниї, алє и о наиходзацих активносцох Националного совиту Руснацох. Тиж, ше побешедує и о студийох на Оддзелєню за Русинистику у Новим Садзе, дзе пошвидко будзе други уписни термин.
Редакторка и водителька емисиї: Саня Дивлякович. Емисию Културна панорама ше емитує кажду нєдзелю на 12:30 г и репризно на 23:00 г, а мож ю послухац на УКТ габох радия РТВ на 92, 100 и 107,1 мгг, и на одложеним слуханю на сайту Радио-телевизиї Войводини.
