РУСКИ КЕРЕСТУР – З нагоди чежкей ситуациї виволаней з вельким огньом хтори залапел ширше подруче Делиблатскей писковини, Општински огньогасни союз Кула послал добродзечних огньогасцох як помоц на загрожене подруче.
На терен послата екипа у хторей були осемцме члени добродзечних огньогасних дружтвох зоз териториї општини Кула, як и зоз ДОД Чонопля. Опремени и порихтани за акцию у нєвигодних условийох, вони ше єден дзень придружели професийним огньогасно-ратуюцим єдинком и другим хтори ше добродзечнє одволали до борби процив огня.
Спред керестурского ДОД у акциї участвовали двоме огньогасци, заменїк предсидателя Елемир Надь и Атила Буш. Як визначел Елемир Надь, ситуация на терену була барз озбильна, нательо же му ше, пре барз печаци писок, аж чижми хтори правени за огньогасцох цалком розпадли. Їх рейон бул околїско населєня Чардак, дзе подполно згорел и єден обєкт, а задаток им бул же би зоз ручнима пирскачками мерковали же би ше огень нє преширел.
Одход огньогасцох орґанизовал Општински огньогасни союз зоз Кули, хтори обезпечел превозку и гориво.
