ДЮРДЬОВ – У центре Дюрдьова, у парку при Задружним дому, штредком авґуста почали роботи на ушорйованю бавилїща.
Спрам технїчней спецификациї зоз поступку явней набавки предвидзене же би виводзаче роботох монтирали осем реквизити за бавенє и забавянє дзецох, и то: мултифункционални комплекс зоз трома тобоґанами, односно три хижки з тобоґанами, потим пендрачка у форми пирамиди, два вишаци гомбалки и ище єдна зоз шедалку у форми гнїзда, гомбалка зоз двома шедзисками, кивадло на федеру хторе здогадує на качку, интерактивни панел – авион, як и провадзацу опрему яц цо то инфо табла, канта за одрутки, лавочки зоз подпору и рефлектор за ошвиценє тей часци парку и бавилїща.
Бавилїще ма буц закончене 45 днї як почню роботи на нїм, та ше обчекує же будзе закончене у другей половки септембра. Вкупна сума на ушорйованю бавилїща 5 милиони 58 тисячи динари, односно 6 милиони 70 тисячи динари з порцию, роботи окончує „Сомборелектрo” доо зоз Зомбору, а проєкт финасовала АП Войводина и Општина Жабель.
