КОЦУР – Всоботу, после придаваня хлєбу, на „Коцурскей жатви” у физкултурней сали Основней школи „Братство єдинство” нащивительом понукнути богати етно стол.
Тоту часц програми отворела заменїца предсидателя СО Вербас и директорка НВУ „Руске слово” Мартица Тамаш, а госцох привитали и Коцана Колєсар и Мария Дудаш з Активу женох, предсидатель КУД „Жатва” Микола Шанта и член УО „Жатви” Микола Медо Ґубаш.
Тамашова Активу женох и „Коцурскей жатви” пожадала и надалєй вельо успиху у роботи, а Колєсарова подзековала шицким вредним коцурским женом хтори ше уж 39 роки трудза приготовициц смачни єдзеня за тоту нагоду.
Як визначела Серафина Киш з Активу женох, на столє були руски, сербски, мадярски, ромски єдзеня – рейтеши, капущнїки, геровци, брескинїи други колачи, а за богати стол постарали ше коло 40 коцурски жени.
Шанта визначел же тота манифестация валалска, понеже у єй орґанизациї участвує цали валал, а и єй циль праве таки – зєдинїц ше и указац компактносц.
Вецей фотоґрафиї зоз тей манифестациї обявени на нашим сайту у фотоґалериї.