НОВИ САД – У Музею Войводини вчера отримана закончуюца Явна розправа о Нарису покраїнскей скупштинскей одлуки о утвердзованю и шветочним означованю Дня Автономней покраїни Войводини и других дньох од покраїнского значеня.
З Нарисом тей одлуки предложене же би ше як Дзень Автономней Покраїни Войводини означовал 25. новембер, дзень кед 1918. року Велька народна скупштина, отримана у Новим Садзе, преглашела присоєдинєнє войводянских обласцох ґу Кральовини Сербиї.
Попри тим, предвидзене же би ше як датуми од покраїнского значеня означовали и 15. май з нагоди Майскей скупштини отриманей у Сримских Карловцох 1848. року, на котрей преглашене творенє Сербскей Войводини, и 10. децембар – Медзинародни дзень людских правох, кед Зєдинєни нациї 1948. року прилапели Универзалну декларацию о людских правох.