ДЮРДЬОВ – Пияток почала, а внєдзелю 5. авґуста закончена 13. Подобова колония Месней заєднїци Дюрдьов. Отримана є у голу Основней школи „Йован Йованович Змай” у Дюрдьове, а на нєй участвовали дзешецеро уметнїки котри намальовали по єден малюнок.
Мая Дорокхази, уметнїца котра участвовала на Колониї, алє помогла и у орґанизациї, визначела же на колониї участвовали школовани уметнїки зоз штреднїм або високим уметнїким образованьом, а водзи ше рахунка и же би векшина учашнїкох були з Дюрдьова.
Малюнки шицких учашнїкох буду крашиц просториї МЗ Дюрдьов, а после вистави, котра бу мала буц отримана по конєц рока, даєдни буду вихасновани за активносци МЗ, як и валалских дружтвох, здруженьох и явних институцийох.
Подобову колонию финансийно потримала Општина Жабель, односно Месна заєднїца Дюрдьов, як и спонзоре – власнїки ресторанох Даниєл Летич и Мирко Хромиш, котри обезпечели полудзенок и вечеру за учашнїкох.
