НОВИ САД – Центер за реґионализем зоз Нового Саду у сотруднїцтве зоз Ханс Сайдел фондацию (Hanns Seidel Stifung), орґанизовал конференцию на тему Запровадзованє билатералних спорозуменьох о защити правох националних меншинох котри Република Сербия подписала зоз Горватску, Мадярску, Румунию и Сиверну Македонию.
На конференциї присуствовали представителє державних институцийох, дипломатских представительствох, фаховци и представителє цивилного дружтва, и националних совитох. Спред Националного совиту рускей националней меншини участвовал проф. др Михайло Фейса, а модераторка конференциї була Єлена Перкович котра и активна сотруднїца Центру за реґионализем.
Як визначела Перковичова, тоти спорозуменя „наймоцнєйши” правни рамики котри дефиную обласц защити меншинох у спомнутих жемох алє и основа за квалитетну оцену реализованих препорукох котри ше приноша на схадзкох Медзивладових комисийох котри инструменет запровадзованя спомнутих документох. На тогорочней конференциї констатоване же статус и положенє меншинох остатнїх рокох нє у фокусу явних политикох цо уплївовало и на динамику зволованя схадзкох Медзивладових комисийох, и же ище вше єст отворени питаня.