НОВИ САД – Спортски бависка (СБ) „Яша Баков” внєдзелю, 3. децембра, у просторийох Руского културного центру (РКЦ) у Новим Садзе, закончели тот змагательни рок, у турниру у пикаду и штреляцтве.
На турнире у пикаду у хлопскей конкуренциї змагали ше екипи „Папивинґ” зоз Вербасу, „Миклошевци” зоз Миклошевцох (Република Горватска), екипи Спортского дружтва „Русин” зоз Руского Керестура, „Искри” зоз Коцура, Дружтва Руснацох зоз Суботици, КУД „Тарас Шевченко” зоз Дюрдьова и два екипи домашнього РКЦ Нови Сад. У женскей конкуренциї було лєм два екипи – „Папивинґ” з Вербасу и КУД „Тарас Шевченко” з Дюрдьова.
Екипно найлєпша були екипа РКЦ Нови Сад 2, на другим месце була екипа Дружтва Руснацох Суботицаа, треци були „Миклошевци”. У поєдинєчней конкуренциї перше место завжал Владимир Джмура (Дружтво Руснацох Суботица), Иван Горняк (РКЦ 1) друге место, а треци бул Желько Гарди (РКЦ 2).
У женскей конкуренциї найлєпша була Машенька Папуґа („Папивинґ”), друге место освоєла Мария Хромиш (КУД „Тарас Шевченко”), а треце Лидия Горняк (КУД „Тарас Шевченко”).
У мишаней конкуренциї, по резултатох, найлєпша бул екипа „Папивинґ”, а друге место освоєла екипа КУД „Тарас Шевченко”.
На турнире СБ у штреляцтве ше змагали осем екипи, а победзела екипа КУД „Тарас Шевченко”. Друге место освоєла екипа Дружтва Руснацох Суботица, а треце РКЦ Нови Сад.
У поєдинєчней конкуренциї найлєпши були Михайло Киш (282 круги), друге место освоєл Мирослав Киш (256 круги), а треце Янко Цап (253 круги), шицки троме зоз екипи КУД „Тарас Шевченко” зоз Дюрдьова.
