За канализацию 600 милиони динари

автор зам  фото ку-медиа
847 Опатрене

КУЛА – Општина Кула з Министерством польопривреди и защити животного штредку подписала Меморандум о порозуменю вязано за початок вибудови нєдоставаюцей канализацийней мрежи у Кули и Червинки. Меморандум у будинку Општини Кула вчера, 16. марца подписали державна секретарка у спомнутим министерстве Стана Божович и предсидатель Општини Кула Перица Видеканїч, а на подписованю присуствовал и покраїнски секретар за урбанизем и защиту животного штредку Владимир Ґалич.

5-Kula-02

Вредносц роботох на вибудови канализациї 600 милиони динари, половку обезпечує Општина Кула, а другу половку Покраїнска влада и Министерство польопривреди и защити животного штредку. Попри тим же Кула и Червинка буду мац канализациї, з тим будзе ришене и одводзенє одрутних водох, хтори ше тераз злїваю до найчарнєйшей еколоґийней точки у Европи – до Велького бачкого беґелю.

Предсидатель Општини Кула Видеканїч з тей нагоди визначел и ришованє того еколоґийного проблему, хтори ше барз одражує на здравє гражданох, а державна секретарка Стана Божович же подписованє того меморандуму значне нє лєм за кулску општину, алє и за висши уровнї власци, бо указує на добре медзисобне сотруднїцтво, на хасен гражданох.

Канализация будзе длуга 55 километри, спомнуте министерство у тей инвестициї участвує зоз 150 милиони динари, а з доконченьом вибудови канализацийней мрежи Општина Кула сполнї и обовзку спрам Европскей униї, по контракту о вибудови главного построєня за пречисцованє одрутних водох у Вербаше.

Як вчера поведзене, ище баржей будзе сполнєта морална обовязка власци спрам гражданох општини, односно датей обецунки же тот комунално-еколоґийни проблем будзе ришени.

ПОВЯЗАНИ ТЕКСТИ