Найновша акция „Вежнї рахунок и победз”, у котрей гражданє на касох збераю фискални рахунки и участвую у наградним бависку, достала вельки одгук. Шкатули и канти до котрих ше, иншак, рахунки одруца, тих дньох цалком празни.
Бо, кед пошлєце дзешец рахунки на котрих найменєй 100 динари, можеце достац вредни награди – квартель у Беоґрадзе, авто фиат, путованя до Америки, билу технїку, апарати…
Хтори би то житель Сербиї нє пожадал квартель у Беоґрадзе… Та, и кед нє вери же вицагнє премию, вери до тих дробних наградох, вони обично нє намесцени.
Поготов же є задармо – коверти, до котрих ше кладзе рахунки, достава ше задармо, а нє плаци ше анї поштанску марку. Односно, анї су нє задармо. Перши тираж од два и пол милиони коверти просто розґрабани, та ше их почало и препредавац спод руки. Но, тоти цо менєй веря до щесца, пошли и далєй, та препредаваю полни коверти – зоз рахунками.
Акция будзе тирвац пейц тижнї, цали марец и перши тидзень у априлу.
Но, вона нє нова. Порушал ю Младян Динкич ище 2004. року, а резултати очиглядни.
Гражданє би ознова требали похопиц же прейґ фискалних рахункох власц ма увид до обтоку фирмох, прейґ нїх наплацує порцию, прейґ того видвоює за школство, здравство, пензиї… Трима ше же часц шивей економиї у БДП коло 30 одсто, а план же би ше 2020. рок зменшала на 26 одсто.
Без огляду на шицко, фаховци ше закладаю за систематичне ришованє цалого платного обтоку, фискалней политики… У нєй би нашо тайкуни и политичаре нє були ошлєбодзени од шицких винох.
У сушедней Румуниї, уж даскельо тижнї тирваю протести пре шиву економию, леґализацию корупциї. Масовни су, нємили, и покус кирвави. Румунє престали зберац фискални рахунки.
Становиска висловени у тим тексту виключно авторово и нє вше одражую ушорйовацку политику новинох „Руске слово”.
www.vinaji.net