З „Дору” закончени 50. Мемориял

автор мар
852 Опатрене

РУСКИ КЕРЕСТУР − Всоботу, 24. марца заварти 50. Драмски мемориял Петра Ризнича Дядї зоз госцуюцу представу „Дора” Маґдалени Фридрих Ґреґоровей, котру одбавел ансамбл Камерней сцени „Мирослав Антич” зоз Сенти, у режиї Бранка Вучетича.

„Дора” представа драмского жанру котри розрабя судьби нєзадовольних особох у малим штредку одкадз людзе лєм одходза, а представа провадзена зоз питанями чи вериц до Бога, до чловека и до любови, и як пременїц власну судьбу. Шестри Дору и Аделу ґлумели Изабела Шантич и Ґордана Николич, Радован Зубац бул Криштоф, Владимир Циґанович ґлумел Марека, а як паноцец наступел Бранислав Унґинович.

Сценоґрафия була ориґинално поставена источашнє у двох часцох, цо доробене зоз звуками и шветлом котре у цмоти ище баржей указовало на бриґи и чарну судьбу. Награду за найлєпше одбавену улогу, жири публики додзелєл Браниславови Унґиновичови.

IMG_7981

За сентянску Камерну сцену то 31. сезона, а представа „Дора” 99. по шоре котру поставели и премиєрно одбавели 2. фебруара того року. Сценоґрафию обдумали Бранко Вучетич, Мая Радонїч и Дюро Баняц, а костимоґрафию Ґордана Николич. Майстор шветла бул Борис Марковлєв, а звука Светлана Попович. Асистен режиї и суфлерка Тат’яна Николич.

Директор Дому култури Руски Керестур и предсидатель Орґанизацийного одбору Драмского мемориялу Йоаким Рац скорей представи додзелєл подзекованя за участвованє на тогорочним Мемориялу Радио телевизиї Войводини и Славкови Винайови, а Владимирови Дудашови и Дюрови Латякови подзекованя за окремне доприношенє у орґанизациї и ширеню рускей театралней уметносци.

Вецей фотоґрафиї мож поопатрац у нашей фотоґалериї.

IMG_7897

ПОВЯЗАНИ ТЕКСТИ