Инклузия вошла до закону, алє вишла през облак

934 Опатрене

Инклузия у першим шоре би требала подрозумйовац даванє єднаких можлївосцох шицким, як и максималну флексибилносц при задовольованю специфичних образовних и ширших потребох шицких дзецох. Требала би. Гей, у теориї. Пракса указує дакус иншак. Сама инклузия ма за циль унапредзиц фахову потримовку дзецом котри маю почежкосци у розвою, же би през звекшану уключеносц дзецох допринєсла социялизациї и же би звекшала свидомосц и розуменє ширшей явносци о принципох социялней инклузиї.

У инклузивним дружтве кажда особа почитована и прилапена як людске єство. У першим шоре подрозумює даванє єднаких можлївосцох  шицким, а окреме дзецом зоз окремнима потребами же би на цо лєгчейши способ звладали школске ґрадиво, та з тим автоматски подрозумює и уводзенє фахового кадру до настави же би зоз свою роботу олєгчали школованє таким дзецом, алє и же би и цалому колективу у оддзелєню оможлївели лєгчейше отримованє настави. Ґрупа марґинализованих, котрим нєобходне уключованє до рижних сферох живота и дружтва вообще, наисце вше длугша. Ту припадаю дзеци зоз почежкосцами, особи зоз инвалидитетом, чувствительни етнїчни заєднїци, та ЛҐБТ популация.

Ту настава проблем у (нє)толеранциї дружтва. Дружтво, у ствари, тото котре ше муши меняц же би вишло вочи специфичним потребом поєдинцох, а то ше обовязно муши зробиц през законодавну политику, нову образовну, як и социялну систему дзе ше будзе одклоньовац  бариєри. У порядней настави так приходзи до нєскладаня медзи способносцами таких дзецох и дидактично-методичней форми роботи прето же методи роботи присподобени векшини просекових дзецох. Так ше спомалшує розвой дзецох зоз окремнима потребами. Тиж, як сам нєуспих у ученю, так и неґативна воспитна клима и комуникация у оддзелєню може дїйствовац неґативно. Ище векши проблем настава же наставнїки нє едуковани за таки ситуациї. Наставнїк просто нє ма часу пошвециц ше таким дзецом кельо то  нєобходне, а з тим автоматски церпя и други школяре. Так практично наставаю два паралелни програми источашнє, а анї єден анї други нє достаню оптимум од настави.

У наших условийох постої проблем едукациї наставнїцкого кадру. Сама инклузия уведзена на нєпририхтани способ, з чим така яка є нєкомплетна и нєдостаточно преглїбена, направела чежку контарпропаґанду, дзе ше ище баржей шири анимозитет ґу инклузиї у настави.

Сиґурно же ситацию нє олєгчує анї тото же за таки дзеци ище вше нєт окремни учебнїки, анї средства за роботу, а анї учальнї нє маю нєобходну опрему. Треба прилапиц факт же особи зоз почежкосцами часц нашого дружтва и нєобходна им инклузия, алє насампредз у тим шицким им треба обезпечиц одлични условия – од дефектолоґа, опреми и учебнїкох котри им потребни, та и до додатней едукациї як наставнїкох, так и родичох.

Становиска висловени у тим тексту виключно авторово и нє вше одражую ушорйовацку политику новинох „Руске слово”.

ПОВЯЗАНИ ТЕКСТИ