РУСКИ КЕРЕСТУР – Вирни парохиї св. оца Миколая нєшка преславюю перши дзень Рождества Христового – Крачун, хтори дочековали и вчера на Вилїю у своїх домох и у Катедралним храму на чолє зоз нашим преосвященим владиком Георгийом Джуджаром.
На Вилїю дзеци и млади ходзели по обисцох колядовац и винчовац Крачун, а парохиянє го торжествено витали на Всеночним хторе було на 23 годзин. Предводзел го владика Георгий зоз домашнїм парохом о. Михайлом Малацком, госцами о. Алексийом Гудаком, о. Владимиром Еделинскийом Миколком, о. Платоном Салаком ЧСВВ и домашнїма капеланами о. Владимиром Медєшом и о. Михайлом Шантом.
Нєшка на перши дзень Крачуна на 10 годзин у Катедралней церкви владика Георгий будзе предводзиц и Архиєрейску Литурґию на хторей будзе шпивац и домашнї Хор Катедрали св. оца Миколая, вєдно зоз госциньским Хором Теотокос зоз Львова.
Служба Божа була и на 8 годзин, а будзе ище на 17 годзин.
