КОЦУР – Манифестация жридловей фолклорней творчосци Руснацох „Коцурска жатва” нєшка почина зоз пополадньову програму, а и на ютре будзе богати фестивалски дзень.
Манифестация почнє на 18 годзин з виставу малюнкох зоз подобових колонийох и малюнкох на склу Гелени Хома зоз Нового Саду у Етно клубу „Одняте од забуца”, дзе потим, на 18,30 г., Коцурци дочекаю поету Михала Рамача и з нїм пририхтаю нащивительом Литературни вечар.
У Доме култури на 20,30 г. будзе концерт коцурских младих шпивачох, а на 21,30 г. почнє „Тамбурованє”.
Други дзень „Коцурскей жатви” на соботу, 14. юлия, почнє зоз традицийним придаваньом хлєба на площи опрез Руского дома на 17 годзин, дзе наступя дзецински ансамбли, а потим на 17,30 г. у школскей физкултурней сали буду представени етно лакотки. Фестивалска и ревиялна програма у Доме култури почнє на 20 годзин, а потим будзе орґанизована вечера у Пелетовей сали у Коцуре.
Орґанизацийни одбор поволал учашнїкох и госцох же би пришли на тоту традицийну манифестацию чийо отримованє помогли Општина Вербас, Покраїнски секретарият за културу, явне информованє и одношеня з вирскима заєднїцами, Покраїнски секретарият за образованє, предписаня, управу и национални меншини-национални заєднїци, Национални совит Руснацох, Амбасада України у Беоґрадзе, Месна заєднїца Коцур и привреднїки з валалу.