Лєм на валалє мож так жиц

автор сас
1.2k Опатрене

Одмалючка любел природу, салаш на котрим одроснул, з оцом обрабяц жем, намиряц и напавац статок, помагац мацери у загради… А драга го одведла до варошу, дзе жил и робел. Тераз уж єст штири роки як жиє у своїм родним валалє Дюрдьове, и ужива у тим цо му децениями хибело.

Михал Дороцки пред вецей як штерацец роками пошол жиц до Нового Саду дзе достал роботу у месарнї и аж пред трома роками пошол до пензиї. О своїм валалу часто роздумовал. И гоч уживал у  тим же є и супруг, оцец, а познєйше и дїдо, шерцо го нєпреривно цагало до родного валалу.

Купел хижу на Билолебарским шоре и у загради посадзел овоцнїк. Родичох порядно нащивйовал, а хору мацер допатрал. Адаптовал єй хижу и двор, алє зохабел автентични, стародавни випатрунок валалского обисца, и нє менял нїч цо нє мушел. Аж и амбиєнт таки як дакеди при наших старих – на руским пецу дозреваю бишалми, на столє розруцани лупи з ореха, а з тепши пахню печени кромплї на лупи.

– Руски пец сом нє сцел звалїц, просториї остали исти, та ище вше мам коморку, предню хижу, таки розпорядок як пред седемдзешат роками – гвари Дороцки, а просторию у котрей є през дзень, зогрива на шпоргету „смедеревцу”. На дворе звалєл тото цо мушел, а вец и „хижку” справел же би мал дзе одложиц бициґлу, осушиц месо, а влєце и вєшенї вариц маджун и парадичанки. Там мож и шедзиц, одпочивац, а коло нього роштиль, дзе з дзецми Ану и Ваньом, а окреме унучатми – Софию, Давидом, а Серґейом и Катарину експериментую у кухарстве…

ЗАГРАДА И КНЇЖКИ НАЙВЕКША РОЗВАГА

Михал оддавна люби вариц, алє гвари же зоз цестом нє зна, та нє випека таке цо кишнє. Радше порихта стародавни колачи з природних материялох за котри нє потреби миксер. У руским пецу часто варел сарму, капусту, и други єдла, гвари, вец маю окремни смак.

Найвекшу розвагу Дороцки находзи у обрабяню загради и допатраню рошлїнох и овоцох, та є у нєй каждодньово, од яри по позну жиму. Жем обрабя по стародавнє, нє хаснує  хемию, лєм залїва з воду и плєє. Цеши ше же вше ма швижей мархви, петрушки и пастернаку, як и шицко друге цо потребне єу єдним обисцу. Михал збера и чува нашенька и сам продукує пресаду. Гвари же нїч од того цо робел у дзецинстве нє забул. З домашнєй од того цо робел у дзецинстве нє забул. З домашнєй яблонї, кайси, шлївки, вишнї и бишалми прави компоту и  вари маджуну, а того року першираз з штерацец рочней грушки пекол  палєнку. Дакус ше „бавел” и зоз смаками, котрому нїч од єдлох нє проблем зготовиц.

Барз ше люби одпочивац  при кнїжкох, а найволї русинских класикох, трилери, историйни и криминалистични романи. Опре ше на цепли руски пец,  и ужива. У младосци  любел бунтовнїка Маяковского, и ище вше люби почитац тото цо дакеди мал у рукох, та и Пушкина и Турґенєва. Но, тото цо го окреме дотхло, то Библия, хтору од баби нашлїдзел и дзечнє ю чита.

– Моя филозофия така же нє патрим телевизор, бо мушим слухац и тото цо ме нє интересує,  а у дньових новинох остатнї час нє можем найсц гевто о чим бим  любел знац. На радию ми часто лєм музика грає.

DSCN7034

НЄ СЦЕ РОБИЦ ЯК СИЗИФ

Пошвидко будзе пейц роки як є, так повесц, цалком у природи, у природним околїску, ґу чому длуго чежел. Обисце у котрим жиє, у остатнєй улїчки у валалє, дзе нєт гужви, док у  варошу жил у квартелю коло хторого вше бул галайк.

 – У Дюрдьове „живот нє понагля”  то ми одвитує, як и нєпреривна цихосц. Ту, на отвореним, вжиме мож дихац з полнима плюцами – гвари вон. Гоч пензию здобул як месар,  нє планує викармйовац статок и живину, а змаржовач хаснує лєм за желєняву и овоц, бо нє люби кед у дачим єст конзервансу. Гвари же ше вецей нє виплаци викармйовц анї статок, анї живину, а ґу тому нє люби же би  гоч цо длуго  було у змаржляку.

Дороцки ище як дзецко бул свидоми же ше муши робиц, та тото и полюбел.

– Теди ше дзеци на салашох и бавели, алє и часто помагали родичом. Чували швинї, крави, а  накадзи зме рушели до школи,  ходзели  зме на польо копац –  памета Михал. До дзеведзешатих обрабял дїдову и оцову жем.

– Дакеди парасти без почежкосцох виховали и вишколовали дзеци, куповало ше и квартелї у варошу. Тераз ше з преобком меншей поверхносци жиє як з минималцом. Репроматериял драги, купци и накупци спущую цену, а кельо парастови останє, нїкому нє бриґа – скаржи ше Михал, котри пре таки условия вецей нє планує обрабяц жем. Плановал же у пензиї будзе мац дробизґ на дворе и прашачку у кармику, алє гвари, робиц як Сизиф, нє будзе. Прето вельки плани нє ма,  свидоми же ше нє уда шицко так як задумує, сиґурни є  же му валалски амбиєнт баржей одвитує як гевтот у варошу, гоч там векши вибор културних случованьох.

У Дюрдьове часто нащивює и провадзи роботу обидвох кулурно-уметнїцких дружтвох. Розвагу нашол и у Здруженю пенизонерох дзе є одпочатку того рока предсидатель.

– Шахисти найупартейши, вони порядни на друженьох котри орґанизуєме до поладня, кед пиячни дзень, стреду и всоботу. Нє маме донациї, фунансуєме ше з членарини, та нє мож вельо  того поробиц. Алє вше єст осетених, вше дахто принєше дзешец деки кафи або соку, та можеме дакого и привитац, а найлєпше  тото же вше маме бешеди – гварел Михал Дороцки.

ТАК ЯК ДАКЕДИ

Михал нє лєм же люби пририхтовац рижни єдла на стародавни способ, алє и дзечнє дава рецепти. Одгаднул як ше прави стародавна лакотка, котру ридко правя уж и старши ґаздинї – китникез.

 – Очисцену овоц пошекац положиц на цихи огень. Док омегча успац исте количество цукру и мишац. Вариво готове кед ше згушнє, а то ше найлєпше преверює, як Михал гвари, так  як дакеди робела його баба. Кед ше з вареху прецагнє по сподку шеренї, видно сподок. По смаку мож положиц нашекани орехи, а потим улляц до мустри котри треба закриц з ценшу хлєбовку и одложиц до жимней просториї. Таке може стац по яр, а з часом лакотка вше густейша…

DSCN7031

ПОВЯЗАНИ ТЕКСТИ