НОВИ САД – Привредна комора Войводини вчера, 28. фебруара, преглашела найлєпших погосцительох у 2016. року, а тогорочне припознанє „Капури успиху” за квалитет услугох у своїх катеґорийох достали Етно-населєнє и етно-готел „Врдницка кула” у Банї Врдник, Готел „Премиєр президент” у Сримских Карловцох, Винария „Деурич” з Малей Ремети и Салаш Дьордєвич у Шуплїку.
Плакети за квалитет услугох достали Ресторан ЦФК з Вербасу, Етно-хижа „Тошова хижа” з Ярку, Салаш Татич з Туриї, „Арт кафе” з Канїжи, Фамелийна пиньвица вина „Селекта” з Ґудурици и Фамелийна винария „Виник” з Вершцу.
З нагоди додзельованя припознаньох, подпредсидатель Покраїнскей влади Дьордє Миличевич гварел же швидши провредни розвой Войводини – перши и найзначнєйши приоритет Покраїнскей влади, а у тим опредзелєню туризем забера значне место.
Припознанє „Капури успиху” ше уж 25 роки додзелює за посцигнути квалитет услуги у катеґорованих обєктох змесценя, ресторанох и обєктох хтори представяю мултиетнїчну заєднїцу Войводини и формую войводянски туристични вредносци.