НОВИ САД – Наша писателька за дзеци и редакторка „Заградки” Мелания Римар добитнїца єдней з наградох познатих „Змайових дзецинских бавискох”. Як на схадзки 11. мая одлучел Управни одбор Медзинародного центру литератури за дзеци – „Змайово дзецински бависка”, Римарова достанє Награду за популаризованє литератури за дзеци.
Грамоту „Змайових дзецинских бавискох” за позарядове доприношенє творчосци за дзеци того року достанє писателька Миряна Стефанович, а Награду за окремне творче доприношенє сучасному виразу у литератури за дзеци писателька з Беоґраду Владислава Войнович, одлучене на спомнутим управним одборе.
Тиж так, принєшена и одлука же „Змайову поетску палїчку” того року будзе ношиц писатель з Кралєва Деян Алексич, котри и отвори 60. „Змайово дзецински бависка”, а спомнути припознаня наградзеним, медзи нїма и Римаровей, буду уручени 7. юния у Сримскей Каменїци.