На Хорски фестивал „Карпатох” одволали ше пейц хори

автор апм
963 Опатрене

ВЕРБАС – У Културно просвитним дружтве „Карпати” отримана осма по шоре Смотра хорох, традицийна манифестация хтора од окремней значносци за руску националну заєднїцу, на хтору ше одволали пейц хори – Хор КПД „Карпати” з Вербасу, Хор Дома култури з Руского Керестура, Хор „Гармония” з Нового Саду, и два госцуюци хори – Хор Културного центру Вербас „Бачки шпиваче” и Хор Здруженя сербско-греческого приятельства „Ирида” зоз Сримскей Митровици.

На самим початку, зоз своїм шпивом, госцох привитал хор КПД „Карпати” хтори чишлї коло 25 членох, а на своїм репертоару ма класични, народни и духовни писнї. Потим наступел Хор грекокатолїцкей парохиї св. апостолох Петра и Павла и Руского културного центру з Нового Саду „Гармония”на чиїм репертоару духовни и шветовни композициї, на вецей як дзешец шветових язикох.

Манифестацию у Вербаше возвелїчали и Мишани хор Дома култури и Катедралней церкви св. оца Миколая зоз Руского Керестура, Хор „Бачки шпиваче” и Хор Здруженя сербско-греческого приятельства „Ирида” зоз Сримскей Митровици

Фестивал провадзели велї визначни госци медзи хторима були и предсидатель Вивершного одбору Националного совиту Руснацох Желько Ковач, предсидателька Одбору за културу Ґабриєла Саянкович, предсидатель Роботного цела за младеж Сашо Сабадош, народна посланїца Олена Папуґа, помоцнїк покраїнского секретара за привреду и туризем мр Серґей Тамаш, Мартица Тамаш, директорка НВУ „Руске слово” и подпредсидателька Скупштини општини Вербас, член Општинскей ради Вербас Мариян Миянович, помоцнїк предсидателя Општини Предраґ Роєвич, заменїца предсидателя Општини Миляна Штулич, началнїца Оддзелєня за дружтвени дїялносци у Општини Вербас Мира Недич, предсидатель Националного совиту Українцох Михал Кржачек, директор Културного центру Вербас Рихард Хенґл, предсидатель Союзу Руснацох Українцох Сербиї Боґдан Виславски и други госци.

Конферансу водзела Дияна Мученски, а после официйней часци програми, друженє хористох предлужене у Центре за физичну културу „Драґо Йовович”.

Манифестацию потримали Национални совит рускей националней меншини, Завод за културу войводянских Руснацох, општина Вербас, Покраїнски секретарият за културу, явне информованє и одношеня з вирскима заєднїцами и Покраїнски секретарият за образованє, предписаня, управу и национални меншини- национални заєднїци.

ПОВЯЗАНИ ТЕКСТИ