ДЮРДЬОВ – Фестивал жридлового шпиваня „Най ше нє забудзе”, шеснасти по шоре, дюрдьовского Културно-уметнїцкого дружтва „Тарас Шевченко”, будзе отримани на соботу 18. авґуста.
Як и каждого року будзе мац три часци. Пополадню, на 16 годзин, опрез будинка домашнього дружтва будзе вистава старих ремеслох, а на 17 годзин у Рускей школи будзе представена часц вистави з Каталоґа „Руска одлога” котру потераз явносц нє видзела. На вечар, на 20 годзин, у Задружним доме почнє змагательни концерт, а после нього и ревиялна часц у котрей наступи Шпивацка ґрупа „Дюрдєвак”.
После преглашованя найлєпшей шпивацкей ґрупи и додзельованя специялней награди, друженє будзе предлужене у просторийох Културно-уметнїцкого дружтва „Тарас Шевченко”.